Adsense

Friday, 26 June 2015

ملخص ماحدث فى مصر الاسبوع الماضى

ملخص الأسبوع الخميس - 25/6/2015 :-
- ملخص مسلسلات رمضان .. عادل إمام يساري ثوري ؛ معتز الدمرداش بيمثل وبيحب سيدة ثلاثينية وهي مدام فيفي عبده .. داليا البحيري كوميديانه ... وخميس يعود من جديد على قناة مصر الان .. ومطاعم أم حسن بتعمل الكفته عالطاقة الشمسية .. وعبد الله مشرف إتعمل فيه مقالب في كل برامج الكاميرا الخفية زي كل سنة .. الراجل دا بيكسب فلوس من المقالب أكتر من الفلوس إللي بيكسبها من التمثيل.
**********
- قيادي بالمخابرات الحربية : حماس إشترت أراضي وفلل في التجمع الخامس.
أغبيا ... ماونتن فيو أحسن 100 مرة .. وهيقدروا يعملوا chill out براحتهم .
البلد دي والله مافيها حد عاقل
لينك

**************
جريدة الوطن : تنظيم داعش هو المسؤل عن تسريب إمتحان الإقتصاد والإحصاء.
إحنا والله يا جماعة عبء عالكوكب دة .. ويوما ما الطبيعة الأم هتغضب علينا من إللي بنعمله دة
لينك
*************
- بعد براءة أحمد موسى .. بلاغ من سمير صبري ضد "الغزالي حرب" لمحاكمته جنائيا بتهمه التهييج ضد الدولة
ايوا .. هي التهمة كدة .. التهييج .. بس السؤال .. البراءة دي علشان هوا مشتموش .. وألا شتمه بس إحنا هنسامحه ومتعملهاش كدة تاني.
لينك
**********
- براءة " شاهي " التي تمتلك أشهر 80 موقع إباحي من كل التهم المنسوبة إليها
للأسف القاضي ناجي شحاتة متعاطف مع القواضي إللي بتخص المواقع الإباحية بالذات grin emoticon
لينك
***********
- محافظ الإسماعيلية يفتتح “نافورة” أمام ديوان المحافظة.
إتفرجوا عالصور يا ولاد .. عربيات شرطة وسجادة حمرا وقوات تأمين .. علشان السيد المحافظ يفتتح " نافورة ".
لينك
***********
- تهاني الجبالي تفوز بجائزة الدولة التشجيعية ؛ عن إية بقى ؟ ... خد الجملة الجاية " عن اسهامها في العلوم الاقتصادية والقانونية ودعمها الحماية الدستورية لمبدأ العدالة الاجتماعية "
لينك.
***********
- وزير النقل : مطالبات جماهيرية بزيادة اسعار تذكرة المترو من جنية إلى 3 جنية .. وندرس تلبية طلبهم
مطالب جماهيرية .. جمهوريات ما وراء الموز والله يا جدعان مبتعملش كدة .. غحنا إهانة والله للكوكب دة
لينك
*************
- القرية الفرعونية تضع صورة رئيسة الوزراء الإسرائيلية جولدا مائير في متحف "نساء رائدات " ... ضمن نساء أثروا في الحضارة الإنسانية.
ايوا دي الولية إللي كانت بتقود إسرائيل أثناء الحرب معانا .. بس إحنا إعتبرناها رائدات وكدزة.
لينك
*************
- خناقة نسائية وضرب بالشباشب فى مؤتمر للاحتفال بانجازات السيسى .. اه حضرتك ضربوا بعض بالشباشب في أمسية ثقافية في حب السيد الرئيس .. بس الغيرة بقى
لينك.
*************
- حسب تسريبات ويكيليكس الاخيرة .. انا والبقال إللي تحت البيت فقط إللي مطلبناش دعم ومكتبناش تقارير للسفارة السعودية.
بس بردوا الثورة كانت مؤامرة وكدة وبتاع .
*****************
- في حيثيات قضية تخابر مرسي مع قطر .. بجانب الاحراز إللي منها أغنية " صوتي يا تهاني " حيثيات الإتهام الموجهه لية ولجماعته هي ممارسة السياسة.
ايوا جماعة أحد قياداتها رئيس الدولة وقيادي تاني رئيس برلمان وعندها حزب سياسي.و القاضي بيقولك: كانوا يهدفون إلى العمل السياسي
لينك
***************
- اليمن والعراق وناميبيا تتفوق على مصر في «جودة الحياة» .. مصر للطيران ضمن أسوأ 10 شركات على مستوى العالم.
سبعتلاف سنة حضارة
لينك متعدد المصادر
**************
- الزند يطيح بأعضاء جهاز الكسب غير المشروع بالكامل
كلهم ؟؟ اه كلهم طبعا .. دول إللي قرفوه شويتين في موضوع الأرض إللي سرقها في بورسعيد بالمناسبة .. وأساسا دولة وزير عدلها الزند مؤكد مش محتاجة جهاز كسب غير مشروع .
لينك
****************
- كوريا الشمالية تعلن التوصل إلى جهاز لعلاج الإيدز والصدفية وفيرس سي .
بالمناسبة ... إللي اعلن الخبر رئيس الهيئة الهندسية للقوات المسلحة الكورية .. بردوا
مصر 1
كوريا الشمالية 1

لينك
**************
- الحكومة تلغي مذكرة تفاهم العاصمة الجديدة مع «العبار» .. وتؤكد إننا هنلاقي ممول إن شاء الله.
بس إنتوا قولوا يا رب .. ورسميا بردوا من الـ 55 مشروع بتوع المؤتمر الإقتصادي .. الحكومة تعلن إن 7 فقط منهم هي القابلة للتنفيذ
شايفك يا شقي ياللي بتقول لينكات .. جايبهملك من كام مصدر smile emoticon
************
- الرئيس السيسي عن الإنتخابات البرلمانية إللي محدش عارف هتتعمل إمتى : لما ييجي عريس لبنتك إسأل علية لأن العروسة هي مصر .. ويؤكد : لازم نقبض على ناس علشان الباقيين يعيشوا
الراجل دة أوتي مجامع الكلام الحقيقة .. يا مجانين grin emoticon
لينك
************
- مذكرة للنائب العام بإعتبار حزب مصر القوية تنظيم إرهابي.
دا احنا هنشوف أيام يا ولاد smile emoticon
لينك
****************
- المذيع خالد ابو بكر يطالب الرئيس بفرض ضرائب على الشعب لتمويل كشروع حفل قناة السويس.
بسم الله الرحمن الرحيم ... الإجابة : اه هيا ايام سودة
لينك
**************
- بعد الإفراج عن أحمد منصور .. عمرو أديب يؤكد إن عنده معلومات سرية إن قطر إشترت نص ألمانيا .. ولسبب مجهول عمرو مستاء إنه بيتفتح من اليمين مش من الشمال.
ايوا .. قطر إشترت نص ألمانية من عند ألمانيا المحطة كدة واحمد موسى يصرخ : المانيا بلد مفيهاش قانون ولا ديمقراطية ولا حرية
فيديو + حد يشوفلنا موضوع تقطيع الشرايين في نهار رمضان بيبطل الصيام وألا لأ.
***************
- رئيس الوزراء محلب ردا على صفحة " علشان لو جة ميتفاجئش " : متفاجئتش على فكرة.
عايزين تفاجئوني ... طب مش هتفاجئ
لينك
************
- نادر بكار: قادة "الإخوان" أخطر من الشيعة وكثير منهم "مجرمون" .. برهامي يحذر الحكومة : الشباب بالسجون سيتأثرون بأفكار الإخوان
الأتنين دول تحديدا ممسوك عليهم مكتبة صوت القاهرة للصوتيات والمرئيات .
لينك
*****************
- وزير الإسكان : إللي مش هيتفذ قراراتي هنزله بالشبشب.
لينك
***************
- أحمدي نجاد : الدول الغربية تسعى لإعتقال الإمام المهدي .. ومسؤل جزائري يدعو إلى تقليص عدد أيام رمضان إلى 13 يوم.
الشرق الاوسط دا تقريبا مفيهوش حد عاقل يا اخوانا.
لينك
***************
- دار الإفتاء تصدر فتوى مهمة جدا ينتظرها جموع المسلمين عن حكم استخدام " الشطاف في نهار رمضان "

لينك .
****************
- مبروك يا شعب مصر .. سويسرا تبلغ مصر رسميا وقف التحقيقات في إسترداد الأموال المهربة للخارج.
اه يا برنس .. مفيش جنية هيرجع لأننا بقالنا سنة ونص محدش خاطب الجانب السويسري اساسا عن فلوس الحرامية.
عاشت ثورة 30 يونيو المجيدة
لينك
*********************
- إسرائيل تؤكد تصدير الغاز لمصر نهاية 2017.. وتكلفة توصيله 500 مليون دولار
ايوا حضرتك إحنا بقالنا 8 سنين بنصدر الغاز لإسرائيل بسعر 3 دولار في الوقت اللي سعره العالمي 14 دولار .. وأيوا المحاكم المصرية رفضت وقف التصدير .. وايوا التصدير كان بيتم قدام عيون كل الجهات السيادية جيش ومخابرات .. وايوا هنستورد الغاز الاسرائيلي بداية من 2017 بالسعر العالمي بردوا
بس متنسوش ... ثورة يناير كانت مؤامرة تهدف إلى اسقاط الوطن.
عدا ذلك كل شئ هادئ في مصر

No comments:

Post a Comment

Advertisement